యాపిల్ ,గూగుల్ ప్లే స్టోర్ కు పోటీగా ఫోన్‌ పే ఇండస్‌ యాప్‌స్టోర్‌ వచ్చేసింది.. ప్రత్యేకతలివే!📱🌐

దేశీయ వినియోగదారుల కోసం ఓ కొత్త మొబైల్‌ యాప్‌ స్టోర్‌ వచ్చేసింది. వాల్‌మార్ట్‌కు చెందిన డిజిటల్‌ పేమెంట్‌ సంస్థ ఫోన్‌పే.. ఇండస్‌ యాప్‌స్టోర్‌ను తాజాగా లాంచ్‌ చేసింది.

డిజిటల్‌ ప్రయాణంలో సరికొత్త అధ్యాయానికి ప్రముఖ ఫిన్‌టెక్‌ సంస్థ ఫోన్‌పే తెరతీసింది. తాజాగా ఢిల్లీ వేదికగా డిజిటల్‌ పేమెంట్‌ సంస్థ ఫోన్‌పే (Phone) ఇండస్‌ యాప్‌స్టోర్‌ను (Indus Appstore) లాంచ్‌ చేసింది. మొత్తం 12 ప్రాంతీయ భాషల్లో యాప్‌స్టోర్‌ అందుబాటులో ఉంటుంది. కస్టమర్లకు నచ్చిన భాషలో సెర్చ్‌ చేసి యాప్స్‌ పొందొచ్చు. అలాగే.. 45 విభాగాల్లో 2 లక్షలకుపైగా యాప్స్, గేమ్స్‌ను ఈ యాప్‌స్టోర్‌లో పొందుపరిచింది.

ఇండస్‌ యాప్‌స్టోర్‌ను తీసుకొస్తున్నట్లు ఫోన్‌పే ఇదివరకే ప్రకటించింది. తొలుత ఆండ్రాయిడ్ డెవలపర్ల కోసం గతేడాది అందుబాటులోకి తెచ్చింది. తాజాగా సామాన్య యూజర్లు సైతం దీన్ని వినియోగించుకునే వెసులుబాటు కల్పించింది. ఇన్‌-యాప్‌ కొనుగోళ్లపై గూగుల్‌ ప్లే స్టోర్‌, యాపిల్‌ యాప్‌స్టోర్‌లు 15-30% వరకు ఫీజు వసూలు చేస్తున్నాయి. అయితే డెవలపర్లు 2025 ఏప్రిల్‌ 1 వరకు యాప్‌ లిస్టింగ్‌ ఫీజు చెల్లించాల్సిన అవసరం లేదు. తర్వాత ఇన్‌–యాప్‌ బిల్లింగ్‌ కోసం తమకు నచ్చిన థర్డ్‌పార్టీ పేమెంట్‌ గేట్‌వేను ఎంచుకునే వెసులుబాటును అందుబాటులోకి తెచ్చారు. 

ప్రస్తుతం ఇండస్‌ యాప్‌స్టోర్‌ యాప్‌ను ఫోన్‌పే యాప్‌ లేదా https://www.indusappstore.com/ వెబ్‌సైట్‌ నుంచి డౌన్‌లోడ్‌ చేసుకోవచ్చు. వెబ్‌సైట్‌ నుంచి నేరుగా ఏపీకే ఫైల్‌ను డౌన్‌లోడ్‌ చేసుకోవాల్సి ఉంటుంది. ఫైల్‌ మేనేజర్‌లోకి వెళ్లి ఏపీకే ఫైల్‌ను ఇన్‌స్టాల్‌ చేయాల్సి ఉంటుంది. అందుకు కావాల్సిన పర్మిషన్లు ఇచ్చాక యాప్‌ మీ ఫోన్‌లో ఇన్‌స్టాల్‌ అవుతుంది.

అనంతరం మొబైల్‌ నంబర్‌కు వచ్చే ఓటీపీని ఎంటర్‌ చేయడం ద్వారా లాగిన్‌ అవ్వొచ్చు. ఆపై మీకు నచ్చిన యాప్‌ను స్టోర్‌నుంచి డౌన్‌లోడ్‌ చేసుకోవచ్చు. ఈ-మెయిల్‌ ఖాతాతో సంబంధం లేకుండా మొబైల్‌ నంబర్‌తో లాగిన్‌ అయ్యే విధానాన్ని ఈ యాప్‌ స్టోర్‌ తీసుకొచ్చింది. ఇప్పటికే నోకియా, లావా వంటి కంపెనీలతో భాగస్వామ్యం కుదుర్చుకుంది.📱🌐